Tradisi Dan Budaya Masyarakat Betawi (2) --- Jadi Pengejek ---

Cengkareng, 25 September 2012

 Abis malemnya muludan, paginya berangkat lagi ke TKP. Nganterin mpok saya buat jadi ”pengejek”. ”Pengejek” adalah pelayan nyang ikut membantu kelancaran dalam suatu acara resepsi perkawinan dalam masyarakat Betawi. Biasanya pengejek lelaki kerjaannya mulain dari ngerapiin kursi-kursi nyang berantakan lantaran abis dipake ama tamu-tamu. Ngebuang sisa minuman atau makanan nyang ada di atas meja, supaya meja bersih dan kaga ada sampah, soalnya mao ditempatin lagi ama tamu nyang laennya. Mungutin piring-piring nyang abis dipake makan ama tamu-tamu terus dibawa dah ke bagian cuci piring (biasanya ini kerjaan bocah-bocah, kalo gw nyang kerjain bisa jatoh derajat gw.. hahaha). Nge-refill makanan atau minuman nyang tinggal dikit. Biar di meja keliatan banyak makanan atau minumannya. Kalo pengejek perempuan, biasanya kerjaannya ngelayanin tamu nyang pada mao makan. Kalo tamunya banyak, lumayan pegel juga  jadi pengejek. Tapi kalo tamunya dikit, kita bisa ngasoh. Tapi kita sebagai saudara dari Shohibul Hajat tetep ngarepin kalo tamu nyang dateng banyak mulain dari pagi ampe malem. Biar badan pegel-pegel, nyang penting ati senang. Seneng ngeliat penganten nyang sumringah ajah di pelaminan. Abisnya kalo bukan kita saudaranya nyang ngebantuin, siapa lagi ?

Enaknya jadi pengejek bisa makan gratis sepuasnya. Apalagi kalo ada macem-macem makanan nyang disediain ama shohibul hajat, kita bisa cobain semuanya. Cuman ya itu tadi, kudu nunggu sepi dulu. Soalnya malu, kalo lagi banyak tamu, pengejek malah makan.  Jadi pengejek juga enaknya kita bisa bercengkrama ama sodara-sodara nyang laennya. Nyang biasanya kaga sari-sarinya bisa ketemuan. Dalam kesempatan ini, kita juga bisa saling tukar pikiran dan bercerita tentang kehidupan masing-masing, mulain kerjaan dan nyang laennya. Sesama pengejek kaga ada pembagian tugas secara formalnya. Biasanya kita pada nauin aja. Kalo ada yang belon beres atau kaga rapi, umpama kita tau ya kita beresin dan kita rapiin. Ada makanan nyang tinggal dikit, buru-buru dah kita tambahin biar keliatan masih banyak aja di meja. Ibarat kata kayak orang dagang, pasti kepengen dagangannya keliatan banyak biar banyak pembeli yang terpikat.

Dalem masyarakat Betawi, biasanya acara resepsi kawinan digelar mulain dari pagi-pagi jem 10-an ampe malem jem 9-an. Kalo masih banyak tamu nyang dateng, bisa sampe tengah malem.. Kaga kayak resepsi di gedong-gedong nyang biasanya diatur jam-jaman dan biasanya waktunya juga sedikit. Biasanya kalo pestanya di gedong, acaranya dimulain dari siang jem 11-an sampe jem 2-an. Paling telat jem 4. Biasanya tamu nyang dateng serempak. Misalin ada 1000 tamu nyang diundang, pada waktu ampir bersamaan pastinya tuh gedong penuh sesak ama tamu nyang bejibun. Perjalanannya juga, kalo jalanan lancar bisa tepat waktu sampe lokasi. Lha kalo macet ? Bisa telat sampe lokasi. Mending kalo telat-telat dikit mah. Kalo telatnya pas acara udah bubar dan penganten udah pada pulang, kudu balik lagi dah kita. Belon lagi makan ama minumnya, emang sih makanan dan minumannya lebih berkelas, tapi di gedong jarang ada bangku. Alias jumlah bangku nyang disediain panitia kaga sepadan ama jumlah tamu undangan. Padahal tamu undangan datengnya berbarengan waktunya, udah pada janjian kayaknya mah. Bisa jadi kita makan dan minum sambil berdiri. Padahal mah makan dan minum sambil berdiri itu kaga bagus buat kesehatan. Nyang bagus itu makan ama minum sambil telen tang (bisa mati dong..) hehehe. Nyang bagus itu makan dan minum sambil duduk. Kenapa bisa begitu ? Cari aja jawabannya sendiri ya....

Kebeneran saya bisanya jadi pengejek pas malem-malem. Mulain dari abis Maghrib sampe kelar acara. Tamu yang dateng kalo masih ”sore” biasanya masih tamu-tamu biasa. Dan kebanyakan tamu-tamunya si penganten nyang biasanya pada bawa pasangan. Ini enaknya nih kalo jadi pengejek malem-malem. Kita bisa cuci mata.  Apalagi kalo si penganten atau shohibul hajat ikutan rombongan kondangan, bisa jadi jem 11 belom kelar resepsinya lantaran tamu nyang dateng banyak. Dan biasanya para tamu rombongan ini kalo dateng kondangan malem-malem di atas jem 9 malem. Apalagi kalo udah kena duduk, ngobrolnya lama. Itulah enaknya, kita jadi kenal ama rombongan laen. Biasanya biar kata anggota rombongan ada nyang kaga kenal ama penganten atau shohibul hajat, mereka tetep mao dateng rame-rame. Hal ini udah jadi kebiasaan antar sesama paguyuban rombongan kondangan. Nyang tadinya kaga kenal, jadi kenal. Nyang tadinya udah kenal, jadi semakin akrab. Sehingga jalinan silaturahim antar sesama paguyuban nyang biasanya kebanyakan anak-anak Betawi juga, jadi semakin akrab. Dan ini penting untuk keberlangsungan kehidupan Budaya Betawi.

Sepulang dari jadi pengejek di hajatan sodara, sampe rumah langsung tepar. Tentu aja cuci tangan, cuci muka ama cuci kaki dulu, abis itu ngasoh dulu sebentaran. Kalo kata orang tua kalo punya anak kecil di rumah, dari mana-mana aja kaga boleh langsung masuk ke rumah terus nemuin bocah. Soalnya hawa badan kita masih panas. Ngasoh dulu, cuci tangan, cuci kaki ama cuci muka dulu. Bukannya apa, kalo hawa badan panas, ngasoh dulu bentaran biar badan jadi adem. Cuci tangan biar tangan bersih, kalo mao nyolek-nyolek bocah kan enak kalo tangan udah bersih. Cuci kaki, biar masuk rumah kaki udah bersih, kaga ada kotoran nyang ikut masuk. Kalo cuci muka, biar muka jadi seger, bersih kaga ada debu atau kotoran. Jadi kita bisa cium tuh bocah dengan muka kita nyang udah bersih. Itu logikanya. Jadi, untuk hal-hal nyang berbau mistis, kita kembaliin aja pada kepercayaan masing-masing.